ЗЭЛЬВЕНСКІЯ САКАВІНЫ-2017
 |
Штогод у родныя мясціны Прыходзіць свята Сакавіны. Зямлі заспанай абуджэнне. Вясны жаданай нараджэнне. |
Зэльвенскія Сакавіны свята асаблівае, бо яно, у першую чаргу, - свята роднай мовы.
Свята “Зэльвенскія сакавіны” пачало ладзіцца ў СШ №2 дзякуючы паэту-земляку Уладзіміру МАЗГО. Сваю назву Сакавіны атрымалі і ад месяца нараджэння пастаяннага госця свята – Уладзіміра Мінавіча, і ад сакавітасці нашай роднай мовы, і веснавога абуджэння прыроды, і пачуцця юных сэрцаў, і ад месяца, у якім яно заўжды адбываецца… Усяго і не выкажаш, што ўкладваюць у дарагую ім назву настаўнікі і навучэнцы СШ №2.
Спачатку сустрэчы з паэтам ладзіліся толькі для вучняў СШ №2. Потым ім стала “цесна” ў сценах адной школы, і свята паэзіі выйшла на раённы ўзровень. На Сакавінах традыцыйна прэзентуюцца новыя кнігі, адбываюцца завочныя падарожжы па мясцінах роднага краю, арганізуюцца выставы і агляды. Дзякуючы Уладзіміру Мазго, зэльвенскія Сакавіны наведалі многія цудоўныя творцы: Алена Таболіч, Юрка Голуб, Іван Сяргейчык, Ірына Войтка, Мікола Маляўка, Алег Елісеенкаў, Анатоль Грэкаў, Казімір Камейша і іншыя.
Сёлета традыцыйнае свята паэзіі і музыкі “ЗЭЛЬВЕНСКІЯ САКАВІНЫ-2017” пройдзе 20 красавіка ў раённым цэнтры культуры і народнай творчасці ў 12.00.
Удзел у свяце прымуць: наш зямляк паэт Уладзімір Мазго, пісьменнікі Навум Гальпяровіч, Зіновій Прыгодзіч, дзіцячая пісьменніца Алена Стэльмах.
Чакаем усіх прыхільнікаў літаратурнага слова!
Телефоны: (801564) 7-25-21, (801564) 7-25-83, (801564) 7-25-85, (801564) 7-25-84
Email: sh2zel@tyt.by